Solidariteit Blog

Ek is ʼn groot ondersteuner van Afrika en sy mense. Ek is tog self ʼn Afrikaan. Maar word ek toe hierdie week deur ʼn buitelander gekonfronteer met die versoek om een suksesvolle Afrikaland te identifiseer. Ek dink Botswana, maar as jy bietjie meer oor die land gaan lees, word sy stabiliteit net deur baie diamante en ʼn militaristiese leier verseker. Ek dink volgende aan Senegal, maar moet toe lees dat menseregtevergrype daar algemeen voorkom en dat korrupsie en die verval van infrastruktuur ʼn kroniese probleem is. Ek dink aan Namibië, maar met sy hoë werkloosheid, armoede en swak plaaslike ekonomie kan jy ook nie juis dié land ʼn sukses noem nie. Net terloops, ek het nog nooit self aan Suid-Afrika as ʼn suksesland gedink nie, so my eie land was nie eers op my lysie nie.

Hoekom kan Afrika nie eers een werklik suksesvolle land hê nie? Ek dink die probleem lê juis in die uniekheid van Afrika en sy mense. Ons kontinent is soveel anders as ander kontinente. In Europa moes mense uitnemendheid ontwikkel om nie van honger en koue te sterf nie. In Australië en die VSA moes ʼn klomp tronkvoëls en armlastiges aanvalle van inboorlingstamme, natuurrampe en leë, oop vlaktes trotseer om te oorleef. Ook hulle het lande en kontinente van uitnemendheid geraak.

In Afrika het ons egter baie natuurlike hulpbronne met wildtroppe, vrugtebome en ander voedselbronne wat altyd beskikbaar was – en dít sonder enige erge weerstoestande – en dus het Afrikane nie betyds uitnemendheid aangeleer nie. Juis daarom dat die mense van die Afrikakontinent agter is met geletterdheid, vaardigheidsontwikkeling, landbouproduksie, industrialisasie, infrastruktuurontwikkeling en baie ander dinge waarmee die Amerikas, Europa, Australië en selfs Asië ons ver vooruit is.

Afrika het ook ʼn probleem om sy diverse etnisiteite te akkommodeer sonder dat dit tot geweld, korrupsie of selfs onderdrukking en volksmoorde lei. Die regte model van regering is nog nie vir Afrika uitgedink nie. Ek dink wel indien Afrika se mense op uitnemendheid kan begin fokus en ʼn goeie regeringsmodel gevind kan word, die ander kontinente wel ingehaal kan word. Ons as Afrikane het almal ʼn plig om hierna te streef.

Ander internasionale nuus van die week:

Haïti: Die slegste wat sekerlik met arm, polities-onstabiele land kan gebeur, is om deur ʼn natuurramp getref te word. Dit is wat hierdie week gebeur het toe ʼn kragtige aardbewing Haïti getref het. Die land se hoofstad, Port-au-Prince, is bykans verwoes en duisende mense word vermis.

Venezuela: Dié land gaan tans onder ernstige beurtkrag gebuk, wat die gewildheid van die ekstreem linkse president Hugo Chavez kan bedreig. Venezuela gebruik hoofsaaklik hidro-elektrisiteit en ʼn droogte veroorsaak opwekkingsprobleme.

Pole: ʼn Skildery van die wêreldbekende skilder Claude Monet wat in 2000 uit ʼn museum in Pole gesteel is, is teruggevind. Die skildery is $1 miljoen werd.

Buitenste ruim: ʼn Vreemde, vlieënde voorwerp het Woensdag by die aarde verbybeweeg sonder dat kenners kon bepaal presies wat dit is.

China: Google het die eerste groot multinasionale maatskappy geword wat bereid is om bietjie sy rug styf te maak vir die menseregtevergrype in China. Google het gedreig dat hy uit die land sal onttrek indien China nie sy sensorskap van menseregtegroepe en -aktiviste staak nie.