Dirk Hermann van Solidariteit het ‘n Opebrief aan President Zuma gelees. Lees Open letter to President Zuma hier
Die brief is voor die skildery 19828 Grafskrifte vir Suid-Afrika gelees wat geskilder is deur Salomi Prinsloo.
Mense dwarsoor die wêreld kan nou ʼn kykie kry na van die briewe wat sowat 40 000 Suid-Afrikaners aan president Jacob Zuma gestuur het om die regering te versoek om misdaad die nommer een prioriteit in Suid-Afrika te maak. Die Solidariteit Beweging het vandag ʼn mini-dokumentêre program op die videowebwerwe Stube.co.za en YouTube.com vrygestel, met die titel Die stories van Suid-Afrikaners wat die president nie wou hoor nie. Luister ook Solidariteitradio.
Jacaranda FM het berig.
Die mini-dokumentêre program is deur Solidariteit vervaardig nadat die Presidensie verlede week geweier het om 23 000 briewe te ontvang waarin Suid-Afrikaners hulle kommer oor misdaad met die president wou deel. ʼn Hoorbeeld met dieselfde titel is ook op Solidariteitradio vrygestel. Solidariteit het ook bekend gemaak dat die getal briewe aan president Zuma nou op 40 000 staan.
“Die dokumentêre program gaan oor regte mense en regte emosies. Van die briewe wat die president nie wou ontvang nie word in die dokumentêre program voorgelees. Misdaadslagoffers vertel ook self van hulle hartseer en pyn,” het Dirk Hermann, adjunk uitvoerende hoof van Solidariteit, gesê.
Die ankeraanbieder van die dokumentêre program is die sanger en akteur Steve Hofmeyr. Hofmeyr lees ook van die briewe voor. Gewone Suid-Afrikaners vertel egter ook hulle stories aan die president.
Dr. Duncan Prinsloo en sy vrou, Laetitia, is in die nag in hulle huis oorval. Hy vertel in die dokumentêre program dat sy vrou langs hom in hulle bed doodgeskiet is. Hy self is in sy rug geskiet en half verlam gelaat. Duncan is ʼn veearts wat ʼn groot bydrae tot die boeregemeenskap lewer.
Wim van den Bosch vertel aan president Zuma dat sy pa doodgeslaan en sy ma met ʼn mes doodgesteek is vir twee selfone.
ʼn Emosionele Lenika Snyman vertel dat drie gewapende rowers ʼn tienjarige tweeling van Midrand met vuurwapens teen die kop aangehou en toe hul pa voor hul oë doodgeskiet. Mnr. Kobus Snyman is in die hart geskiet. Sy ouer dogter, Lenika , en sy vrou, Leenette , het ook gesien hoe hy geskiet word.
Maria Rasello van Soweto vertel aan die president van haar dogter wat verkrag en so erg aangerand is dat sy later aan haar wonder beswyk het.
“Ons het besluit om die mini-dokumentêre program op YouTube vry te stel sodat gehore nasionaal en internasionaal na die mense se stories kan luister. Gewone Suid-Afrikaners wil vertel van hulle pyn, hartseer en vrees as gevolg van misdaad. Indien die Presidensie nie wil luister nie, sal die res van die wêreld luister. Ons gaan nie ophou praat nie. Ons eerste prys is om met die regering te praat,” het Hermann gesê.
In ʼn ope brief aan president Zuma skryf Solidariteit dat die briewe ʼn noodkreet van Suid-Afrikaners is. “Hierdie veldtog ontken nie dit wat die regering reeds aan misdaad gedoen het nie, maar erken die mense se gevoel dat misdaad nog buite beheer is. Mense vra, soos goeie demokrate moet doen: Asseblief, regering, doen nog meer; ons voel ons is in ʼn staat van beleg. Verklaar ʼn meer aggressiewe oorlog teen misdadigers.
Die boodskap wat die Suid-Afrikaners verlede week van die Presidensie ontvang het, is dat die president nie na hulle hartseer wil luister nie. Die Presidensie het die hartseer van die mense as ʼn publisiteitsfoefie afgemaak. Die 23 000 briewe wat Solidariteit aan die president wou oorhandig, was van regte mense, met regte emosies en opregte kommer. Talle van die briewe het hulle lojaliteit aan Suid-Afrika bevestig. Dit was dus ʼn positiewe aksie deur positiewe Suid-Afrikaners.
“Meneer Zuma, ons wil graag mense se frustrasies konstruktief kanaliseer. Hierdie veldtog is ʼn positiewe veldtog om Suid-Afrika ʼn beter plek vir almal te maak,” skryf Solidariteit in die ope brief.
Solidariteit het ʼn beroep op Suid-Afrikaners gedoen om nog briewe aan president Zuma te stuur deur die webbladsy www.geagtepresident.co.za of deur die woord “misdaad” gevolg deur ʼn kort boodskap per sms na 35960 te stuur.
Foto’s van die mense wat in die video verskyn, sowel as skakels na al die relevante items is op www.solidariteitmedia.co.za beskikbaar.
Die dokumentêre program kan op www.stube.co.za en you tube besigtig word.
Loading ...
RSS
Newsletter
Twitter
Facebook
Flickr
YouTube
Lees hierdie beleid voordat jy deelneem aan die blog of enige kommentaar plaas.