Solidariteit Blog

Vrydag is Loslitdag. Vir baie is die dag nie veel meer as ‘n plakker nie. Vir my is dit ‘n dag waarop ek waarlik dankbaar kan wees vir die lyf wat ek het. Dit is nie ‘n volmaakte lyf nie, maar hy kan loop, sien, ruik, voel, hoor en proe. My lyf se vingers kan maklik tik, fyn knipwerk doen en maklik ’n pen vashou om te skryf. My lyf  kan sit sonder om, om te tuimel en my nek hou my kop mooi regop. Ek kan tot my oë toemaak wanneer ek bid. Ek kan verstaanbaar praat sonder dat my mond begin kwyl.

In ons gesin is ‘n gebrek aan hierdie dinge doodnormaal. Ons het twee serebraal gestremdes in die huis. Pragtige mensies wat in lyfies vasgevang is wat nie wil saamwerk nie. Wat nie wil luister na hul breine se boodskappe nie. Gestremdes het baie ekstra behoeftes. ‘n Rolstoel van die regte grootte, dikwels met ekstra ondersteuning om die ruggie en nek regop te hou. Spesiale eetgerei, tafels en stoele. ‘n Aangepaste, rolstoel-vriendelike huis. Dinge wat geld kos. Hoekom sal ek dan nie my R10 met ‘n glimlag betaal nie?

Kyk die jaar anders na jou Loslitdag-kaartjie en sê dankie vir jou lyf – ontbrekings en al.

Waarom sou ek nou so iets kwytraak?

‘n Verteenwoodiger van Geopende Deure was die afgelope naweek by ons gemeente in Benoni. Geopende Deure is ’n organisasie wat Bybelverspreiding, evangelisasie en opleiding, in lande waar Christenskap onwettig is, doen. www.opendoors.org.za

Iets wat hy gesê het, het my diep getref. Ons kerke in Suid-Afrika is abnormaal. Abnormaal? Ja! Het jy geweet dat daar elke jaar bykans 100 miljoen Christene vervolg word omdat hulle in Jesus Christus glo? 100 Miljoen mense wat die Here in die geheim moet dien, saggies, ondergronds, tot Sy eer moet fluister in plaas van sing?

Lees verder ‘Kerke in Suid-Afrika abnormaal’