Solidariteit Blog

Hoe bepaal jy wat belangrik is? Waar lê jou toewyding?

Ek sidder as ek dink aan die verskonings van mense om hulself te regverdig, eerder as om God se Woord te gehoorsaam. Vir my is dit soos om God te verloën.

Hoe kan jy sê saambly is eintlik nie so erg nie en ons kerke moet daarby aanpas? Hoe kan jy rondslaap voor die huwelik, sê jy’s ‘n Christen, maar jy ontreinig jouself? Hoe durf jy sê die huwelik is nie ‘n instelling van God nie? Hoe kan jy toelaat dat jou kind in ‘n skool is waar hy ander gode gelyk moet stel aan die Drie Enige God waarin jy sê jy glo? Hoe kan jou optrede lynreg teen God se Woord wees?

Glo jy werklik? Want ek is jammer vir jou, maar as jy sê jy glo in God, moet dit met hart en siel en gees wees. As jy jouself beskikbaar stel as kind van God, moet dit totale toewyding wees, in elke aspek van jou lewe.

Jy durf nie sê jy glo, en dan maak jy verskonings vir goed soos drankmisbruik, seks voor die huwelik, saambly en ander sondes nie!

Om te glo in die Drie Enige God, is om geheel en al jou lewe aan hom te wy, elke aspek van jou lewe moet getuig dat Hy die begin en die einde van jou lewe is.
Lees verder ‘Om te glo is ‘n totale toewyding, nie ‘n halwe een nie’

Kabinetslede spandeer miljoene om te onthaal, te bly en in hul grande motors te ry. Maar die paaie van SA is in so ʼn toestand, dat dit mense se lewens elke dag in gevaar stel.

Ons ry ʼn paar naweke terug na ʼn familie byeenkoms in Natal. Ons kan eers die Vrydag na werk ry, en weet ons gaan in die donker moet ry op ʼn pad wat nie so veilig is nie en ook vol slaggate is. So, tussen Leandra en Standerton, op daai pad wat nou seker al 10 jaar in ʼn toestand is, tref ons een massiewe slaggat. Ons kon nie uitswaai nie, want ʼn trok kom van voor en ons het die gat te laat gesien, want dis donker. Die skade is wat my woedend laat: Twee van die kar se bande is beskadig, twee wieldoppe is flenters en die voorband se velling is beskadig. R 1 000 – 00 vir twee nuwe wieldoppe by Mercedes, R 195 – 00 vir wielbalansering en wielsporing en die res moet ek nog laat herstel.

Maar gister toe ek by die huis kom, kry ek ʼn boete. Ek het 15km/uur oor die toegelate spoedgrens gery op die N14. Ek is sommer op die plek woedend. Ek, getroue landsburger, betaal al my belasting en fooie soos van my verwag word, maar ry vir ʼn heerlike naweek Natal toe, verniel my nuwe kar so dat ek wil huil, maar moet maar rustig wees, getrou wees en ʼn boete betaal! As ek seker was daai boetegeld word gebruik vir die regte doel, het ek dit met liefde betaal, want ek stry nie, ek was verkeerd om 15km/uur oor die spoedgrens te ry, maar die regering het vrede of ek amper dood is omdat hulle oortree en nie die pad onderhou nie.

En wraggies lees ek… Lees verder ‘Regering stel mense se lewens in gevaar’

Oranje is so deel van Solidariteit, dat jy al oranje (en groen) visualiseer as jy ‘Solidariteit’ hoor.
Hier is ‘n lekker interne geveg in Solidariteit die week. Solidariteit is oranje, of is Solidariteit eintlik blou?

Die eerste Personeel Blitz wat gister uit gaan sê:
- Aandag alle personeel
Personeel moet Vrydag korporatiewe klere aantrek. Omdat alles blou is, is individue wat van die Solidariteit-oranje hou en meelewing wil toon, welkom om ʼn oranje hempie aan te trek.
Namens: Adjunk Uitvoerende Hoofde

Twee van ons adjunk uitvoerende hoofde is Cheetahs, trots oranje! Ons wonder wie het die grappie met Henk en Dirk gemaak?
Hier is natuurlik ook ‘n handjievol ander ondersteuners, so paar Sharks, nog so paar Cheetahs, ‘n WP-ondersteuner, maar dis dit.
Vir wie skree die res? Is hulle dan Solidariteit (oranje) of nie?

Vandag gaan die volgende blitz uit:
Soos almal bewus is speel die Bloubulle en die Cheetahs Saterdag teen mekaar in die Curriebeker eindstryd. Solidariteit is bekend daarvoor om standpunt in te neem en nie draadsitters te wees nie.
Ons het dus besluit wie Solidariteit gaan ondersteun. Ons stel voor dat ons die besluit objektief krediteer, naamlik die amptelike kleure van Solidariteit. Ons stel voor dat almal more oranje aantrek.
Dirk Hermann

Is Solidariteit oranje of is Solidariteit blou? Dit sal dus maar deur Saterdag se wedstryd bepaal moet word. Wie gaan Maandag siek of skaam wees – oranje of blou?