Solidariteit Blog

Nog ‘n verdere probleem:

AfriForum oorweeg regstappe nadat Tshwane Metro nuwe bustariewe eensydig instel

AfriForum het vandag in ʼn verklaring kommer uitgespreek oor die onverwagte en eensydige verandering van bustariewe in die Tshwane Metro. Volgens Cornelius Jansen van Rensburg, AfriForum se woordvoerder oor plaaslike regeringsake, het dit reeds ʼn groot impak op publieke vervoer gehad.

“AfriForum het verskeie klagtes ontvang van die publiek. In een voorval is ʼn gesiggestremde persoon, wat reeds ʼn jaarkaartjie gekoop het, ingelig dat sy kaartjie nou ongeldig is. Daar word skielik van die publiek verwag om R6 per rit te betaal. Hy en vele ander wat nie kontant by hulle gehad het nie en nie vooraf oor die planne gewaarsku is nie, was dus vandag gestrand,” het Jansen van Rensburg gesê.

Volgens die busbestuurders is hulle eers Woensdag 30 Junie 2010 omtrent die verandering ingelig. Die eensydige aankondiging het ook amptenare ontkant betrap. Jansen van Rensburg het verneem dat van die busvervoer werknemers oorweeg om te staak weens die gebrek aan konsultasie oor hierdie verandering van die tariewe.

“Die onverwagse aanpassing van bustariewe beteken dat mense wat reeds kaartjies vir die jaar gekoop het, se geld in effek gesteel word. Diegene wat die meeste benadeel word, is die armes, bejaardes en gestremde inwoners van die Metro,” het Jansen van Rensburg bygevoeg.

AfriForum se regspan het in ʼn dringende prokureursbrief aan die Metroraad geëis dat die besluit teruggetrek moet word tot ten minste na ʼn konsultasieproses gevolg is. Volgens die prokureursbrief het die Metroraad 7 dae tyd om hulle besluit in heroorweging te neem.